Search
  • dogniversity

第二章:歡迎光臨~汪汪汪~


上次講到,第一種狗狗吠的情況係當主人番屋企時,狗狗因為太開心,好似成年無見過咁,狂「講野」。呢個情況下,主人點做好?

通常主人番屋企都係用鎖匙,訪客先會襟鐘,我地今日就講用鎖匙開門先。

同煮飯一樣,如果你無預先買定材料,又點可以一放工就番屋企煮飯呢?

材料:

  • 一顆冷靜的心情,唔好俾佢d吠叫聲影響到你

  • 合實個咀,直至佢唔吠先同佢講野

  • 收埋隻手,直至佢唔吠先同佢接觸

方法:

  1. 喺電梯口拎定條鎖匙出黎

  2. 同時,選好要用黎開第一道門果條鎖匙 (咁去到門口時,就可以減低狗狗吠既機會)

  3. 靜靜地開門 (一開始時狗狗雖然仍然會吠,但不要理會牠)

  4. 入屋後,唔理佢唔望佢唔摸佢,當佢透明

  5. 除鞋後,搵個地方坐低,並繼續當佢透明(有需要時,繞起雙手)

  6. 當狗狗一停止吠叫,立即同佢玩,摸番佢

規矩係一吠就唔會有人理佢,一靜就可以同佢玩。

點解要咁做呢?我地習慣左離開屋企一陣或一整天,番到屋企見到親愛既狗狗咁開心咁歡迎自己,其實真係好難唔俾反應既~以心理學家B.F. Skinner指出當一個行為被獎賞既次數愈多,日後再出現呢個行為既機會愈高。人同動物都係一樣。

不如我地又進入狗狗的世界去諗下,當主人番黎,佢吠叫時對狗狗獎賞係咩呢?(俾5秒大家想一想)答案係主人既注意,你有無答岩?

狗狗:主人番黎,我好開心,吠吠吠吠吠吠 x 1000000

主人:番左成日工,我都好掛住你呀~乜你咁曳架又嘈... 同時狗狗不停跳上黎既時候,好自然咁摸下佢,同佢打個招呼

狗狗:blah.. blah... blah... blah.. blah... blah...(一堆聽唔明既語言) 佢摸我呀~我應該係乖

拎走呢啲「獎賞」,等佢知道原來靜靜地主人先會同我玩,吠係無人會理我既。聽落好容易,要持之以恆狗狗先會明白遊戲既新玩法。

俾個小貼士大家,練習入門口唔一定要等到放工番屋企先做得,無時無該大家都可以行出門口企1-2分鐘再番黎,一日行出去100次都得,到時狗狗應該唔會再理你行出定行入架喇!

如果你係習慣襟鐘番屋企既人,我有個好好既建議。就係帶鎖匙啦!咁就唔洗襟鐘啦!要改善狗狗既行為,除左有系統既訓練外,好好管理個環境都好有幫助。

由現在開始,同全家人訂立以上規矩,狗狗先可以學習得更快。如果一個人做,另一個又唔做,狗狗好容易會感到混亂,唔明白究竟點先岩。

要改變狗狗,先改變自己!


170 views
Follow Us
  • Facebook Social Icon
  • YouTube Social  Icon
  • Instagram Social Icon
© 2016 by Dogniversity