第三章:同門鐘玩遊戲


相信好多人都有相同既情況,就係個門鐘一響,狗狗就失左控,好似聾左咁,講乜都聽唔到。

首先,有一樣野好重要既,就係我地唔係要諗點樣令狗狗喺門鐘響既時候唔好吠,而係安排一個合適既情景俾佢學習。好似好複雜咁... 簡單啲講,就好似我地學唱歌咁,要你唱一首難度好高既歌,但係無人同你練習,每日你都要上台表演,結果只會日日俾人噓。同狗狗一樣,只會每日不停地重覆犯錯,然後被鬧,跟住聽日又再吠過。

要改變呢個行為要點做?

材料:

  • 時間(世上沒有不勞而獲)

  • 自己(主人A)+另一個人(主人B)

  • 手機2部

  • 毛巾

  • 狗狗最愛的東西(食物或玩具)

做法:

  1. 如果你個門鐘可以較高低聲量,請調教至最細聲 (如果唔可以調教聲量,可以用毛巾包住發聲既位置,以減低聲量)

  2. 主人A準備狗狗最愛既東西喺身邊,以食物為例

  3. 主人A和B各持手機以便通話

  4. 主人A和狗狗在室內遠離門口位置,並接通主人B的手機,啟動speaker模式

  5. 主人B在門外

  6. 主人A和狗狗做SIT或DOWN既簡單練習,等狗狗專注力喺你身上

  7. 主人A準備好便可請主人B襟一次鐘

  8. 聲量之細加上超級好味既野食,狗狗應該可以暫時不理會這次門鐘聲(如果狗狗走去吠而不吃你的東西,有機會係聲量太大或食物不夠吸引)

  9. 先後次序很重要!是門鐘先響,之後才有食物

  10. 狗狗完全唔需做任何SIT/HAND既動作,只要唔吠就有野食

  11. 完成後,主人A再通知主人B可以再襟鐘

  12. 重複約1-2分鐘便可以

當狗狗可以完全唔理會細細聲既門鐘聲,你就可以考慮將佢較大聲少少,直至不需加毛巾。

貼士:當有任何屋企人番屋企前,打個電話俾屋入面既人,等佢把握呢個機會練習。

呢個練習既目的係要安排一個令狗狗可以成功既環境,咁樣我地先可以獎勵佢做得岩。如果佢永遠都做唔岩,狗狗又點會知當門鐘響既時候,佢要做啲咩呢?

人類慣性地注意別人做錯事既時刻,隻狗又吠喇... 佢又周圍屙尿喇... 叫佢COME佢又唔COME... 但係我地喺狗狗聽話既時候,又有無俾返應有既獎勵俾狗狗呢?任何訓練都可考慮先改變環境,令狗狗較容易成功,之後才慢慢調節到我地理想既情況。你估要狗狗COME,喺屋企做既成功率高啲?定係狗公園?調節好環境才能提高狗狗學習的成功率,唔好專登俾陷阱佢地踩,咁樣只會係一個惡性循環。

要改變狗狗,先改變自己!


find us on
  • Facebook
  • YouTube
  • Instagram
©2019 by Dogniversity